NASKAH PANEMBRAMA

 

PANEMBRAMA( KINANTHI) MENGETI R.A KARTINI

KETAWANG KASATRIYAN SULENDRO PATHET SANGA

APRIL 2011

Naskah: SYUKUR, S.Pd

Umpak –umpak 1

Byar-byar lampune pating galebyar

Cahya damar sumunar akarya bingar

 Televisi radio lan layang kabar

 Aja nanar urip sarwa nganggo nalar

Cakepan 1.

Ngaturaken sugeng rawuh

Pra tamu kang lenggah sami

Atur pambagya rawuhnya

Mugia manggih basuki

Sekecakna lenggah ndika

Angresepi langen iki

   Umpak –umpak 2

    Wer-wer pit motor pating saliwer

    Dalan alus motor bagus mlayu banter

    Aja gugup alon bae bok sing bener

    Ngelingana kluwarga men ora buyer

Cakepan 2

Amengeti wiyosipun

Raden Ajeng Bu Kartini

Slikur April miyos ira

Ing Rembang  putri sejati

Nadyan piningit kang rama

Alelabuh mring pra putri

Umpak –umpak 3

    Dhung-dhung bedhug munya andharundhung

    Sing prayitna dimen padha ra   kesandhung

    Mula  kanca ayo padha metang -metung

    Nandur pohung ledhung- ledhung bisa untung

  

Cakepan 3

Jroning piningit dyah ayu

Darbe gegayuhan suci

Hanjunjung dhuwur wanita

Dimen darajating sami

Emansipasi kaloka

Dadi tuladhan sejati

     Umpak – umpak 4

     Ning –nong  saron peking demung kenong

     Kendhang bonang slenthem  kethuk kempul gong

     Karawitan langgam stambul lan keroncong

     Kabeh mau bisa gawe ati bombong

    

Cakepan 4

Minangka panutup atur

Darwis saking Winongsari

Nuwun agunging aksama

Kalepatan kula sami

Meminta sihing Jawata

Dimen sami manggya  mukti