Geguritan

RADEN AJENG KARTINI

Dening  Syukur Hadi Sutrisno

Kartini.......

Asmamu ngambar arum ngebeki jagad

Bebasan suket godhong  bae padha krungu

Padha nyebut asma penjenengan putri kang sejati

Mangambar asmamu  ora  marga panjenengan  iku trahing kusuma

Mangambar amarga lelabuhanmu marang sesama-samaning wanodya

Kartini

Ya saka labuh labetmu iku ….

Saiki wus akeh wanita sing bisa ngasta pusaraning praja

Saiki wus  akeh wanita sing bisa nggegana

Saiki akeh sipating wanita kang makarya kaya lumrahing priya

Sasat tan beda  priya lan wanita ing babagan pakaryan lan kalungguhan

Kartini

Nadyan penejenegan wus kondur ing ngarsaning  Pangeran

Asmamu tetep ngambar.......

Lan….Asmamu ora bakal katlindhes marang rodhaning jaman kemajuan

Kartini, Kartini.......oh…

Muga antuk nugrahaning Gusti
           
                                                                       Kaliwiro, 27 Maret 2012
 

JEPARA WOLULAS PITU SANGA

Dening  Syukur Hadi Sutrisno

Tengara bakal tumuruning kanugrahan wus cetha

Pratandha Jepara  bakal sumunar  cahyane wus ngegla

Angin sumridhit nggawa kabar gumbira

Pratela bakal mijil trahing kusuma kang  ginantha –gantha

Wolulas pitu sanga

Dina kaping selikur sasine  angka catur

Brol mijil saka guwa garba titahing Gusti asifat wanodya

Dah eba gumbiraning manah tan bisa  sinungging

Suka syukuring kulawarga tan bisa ginambar kehing aksara

Dene surya candra   cahyane prasasat  amung nyoroti Jepara

Jabang bayi kang   katemben mijil nuli pinaringan pusaka nama

Kartini  ngono sesebutane

Wolulas pitu sanga

Wiwit  iku  Jepara kontap ngumbara tekan manca

Wiwit iku  uga Walanda miris….

Kasunyatan jabang bayi kang miyos rikala iku

Dadi keblat tuladhaning  wanita sadonya

Wolulas pitu sanga

Selikur tanggale  April sasine

Dak tulis nganggo mangsi kencana

Kaliwiro, 28  Maret 2012